▪️معكم أختكم في الله ليندة متحصلة على سهادة البكالوريا دورة 2023 بمعدل 17.10 و طالبة سنة ثانية طب و لله الحمد
▪️أولا أدري أنكم في فترة صعبة نوعا ، توتر ، خوف ... و لكن توكلو على الله و ادعوا و بإذن الله تتيسر أموركم🤍و راح نحاول نساعدكم ببعض النصائح
▪️أول شيء و لازم كل مسلم يديره هو التوكل على الله عزّوجلّ و ديرو في بالكم بلي النتيجة راه كاتبها الله انتم عليكم السعي و الله لا يضيع تعب أحد و ادعوا الله ان يوفقكم و ان يرزقكم من فضله الواسع لا على قدر تعبكم ،
▪️ثانيا رضا والديكم و دعواتهم🥹 أيضا هذي الحاجة مهمة و ديرو في بالكم كيما راكم تخافو و تتقلقو هوما راهم يتقلقو معاكم و يخممو عليكم و أكيد يدعولكم بالخير و التوفيق و النجاح ،فانتبهوا،
▪️بالنسبة للأمور لي ساعدوني : أني كنت نحل التمارين بزاف (شعبة علوم تجريبية ) (رياضيات و فيزياء و علوم الطبيعة و الحياة) ، كي تحلو بزاف التمارين راح توصلو لمرحلة كي تشوفو السؤال تتخيلو الحل تاعه و تعرفو الطريقة لي ينحل بيها و هذا هو المطلوب باش مشي كل حاجة ديروها في المسودة نهار الباك! و باش تربحو الوقت لكاش أفكار يكونو جدد في الموضوع ، و تكتسبو و تتقنو المنهجية في العلوم و للناس لي يخافو منها ،راهي ساهلة بإذن الله برك لازم مديروش في راسكم بلي صعيبة و متقدرولهاش لااا ، و إنما تقبلوها و أول خطوة لازم تفهمو الدرس تاعكم مليييح و تبقو خطرة على خطرة تراجعوه باش ماتنسوش(و هذي الحاجة ماكنتش نديرها راه نهدرلكم عليها في الأخطاء) و تروحو تحلو المواضيع و تربطو مع الدرس و كل وثيقة تشوفوها لازم الملاحظة تركزو عليها مليييح اي حاجة تشوفوها صغيرة و لا كبيرة اكتبوها و مايجيكمش احباط من الاول راه تبقاو تغلطو و لوكان ما تغلطوش ما تتعلموش ،و الرياضيات (مادتي المفضلة😅❣️) قلتلكم أفضل حاجة بعد ما تفهمو الدرس تاعكم تحلو التمارين و المواضيع ، حلو قد لي تقدرو و متكرنوش و قولو ماحليناش🤣 حلو حلو والله يساعدوكم بزااف و كيما قلتلكم تولو تشوفو السؤال تعرفو الإجابة مباشرة و راكم شفتو تقريبا الموضوع غير هو و يتعاود ! الأرقام يتبدلو و يزيدك كاش فكرة ولا زوج جدد ولا مجموع !! فماتضيعووش الفرصة ، و الفيزياء نفس الشيء افهمو الدرس تاعكم ملييييح ثم حلو المواضيع بزاف خصوصا مواضيع البكالوريا(ملش مشي غير الفيزيك) باش تعرفو المواضيع ،كيفاه يحطو التمارين كيفاش ينظموهم و كيفاش يطرحو الأسئلة...) ،
▪️و كل شخص منكم على خساب الشعبة تاعه ، حذار تركزو فقط على المواد الأساسية و تهملو المواد المُكمِّلة !!! مكانش انسان تفوق في البكالوريا بالمواد الاساسية فقط ، بالعكس غادي يعاونوكم بزاف و يطلعلولكم المعدل
⬅️مواد الحفظ : لازم تحفظو من الأول ، و ماتقولوش طفرت!!! و ماديروش على لي يقولولكم صايي ما بقا والو! لابغا بقاتلكم ساعة ديرو فيها لي تقدرو! ابدو من هذي اللحظة و احفظو و افهمووووووو ماتعتمدوش على الحفظ فقط! و الإنسان ممكن ينسى فتنقذو رواحكم بالفهامة حتى المصطلحات و افهموهم (و عادي لوكان يجي الباك و نتوما مشي حافظين كلش🤡 انا كنت حافظة شويا و فاهمة لي بقاو و جاوبت بالفهامة ، كيما فالوضعية كتبو قاع لي يجي في راسكم ، متحوسوش تفهمو انا راني عاقلة درت 11عارضة ولا اكثر ، اكتبوووو)
⬅️اللغة العربية ، بالنسبة ليا رقم واحد الأستاذ بوبكر مبروك تبارك الرحمن😭 و كاين بزاااف أساتذو ماشاء الله فقط نسيت الاسماء ، افهمو من عندهم الدروس و دسرو ملخصات في اوراق بيضاء و حلو المواضيع
⬅️ الفلسفة : تاني بالنسبة ليا افضل واحد خليل سعيداني ، اول خاجة خصكم تفهمو و تحفظو المنهجيات ثم المقالات بالوحدة ، و اعتمدو على الفهم اكثر من الحفظ ، انا كنت نحكم مثالة مثلا الرياضيات ، ندير فيديو تاع خليل سعيداني نجيب ورقة بيضاء الفوق نكتب التعريفات و من بعد نقسم الورقة على 2 ،و ندير كل موقف في جهة و نفهم معاه و لكن مانكتبش قاع شا يهدر هكا ماتقدروش تحفظو! نكتبهم على شكل عوارض و أفكار و نكتب الاقوال و الامثلة و شويا شرح و هذو هوما لي نحفظهم ، و نهار لي تجاوبو ، اكتبو في المسودّة الافكار و الاقوال كيما نظمتوهم في الورقة البيضاء و جيبو الورقة المزدوجة و ابدو بالفكرة تتوسعو فيها و تشرحو من الفهامة بلي فهمتوها ،
⬅️اللغات تاني شوفو هذوك القواعد و حلو المواضيع>>أستاذ منصوري💯
⬅️العلوم الإسلامية : أكيد أستاذة بوسعادي و الأستاذ شمس الدين في اليوتيوب ، طريقتي كانت أني ندير فيديو تاع أستاذ شمس الدين نفهم من عنده و موراها نحفظ من عند الأستاذو بوسعادي و حلو مواضيع هكا بإذن الله راكم 😍↗️↗️↗️↗️
⬅️الرياضة: كنت دايرة إعفاء🤣 (نضحكو شويا🥲)
🔴من أهم الأخطاء لي تمنيت لوكان مادرتهمش و أثرو عليا و لازم ماديروهمش :
1_ تضييع الوقت ، خصوصا الهاتف!! كي تبدو تقرو حطوه بعيد عليكم و طفووه ولا خرجوه قاع من الغرفة لي راكم تقرو فيعا هكا مام لوكان يجي فس بالكم يكون بعيد و اذا تقرو بيه حاولو تعوضوه بحاجة أخرى ،
2_تأجيل الحفظ⚠️ >>تراكمو عليا الدروس>>وليت نحس بضغط كبير>>و بدا يجيني الإحباط و الخوف ،و اذا مازال ماحفظتوش و كاين ناس مازال ما حفظوش علابالي توكلو على الله ،و بدو ماتخافوش احفظو و افهمو و ما تعتامدوش على الحفظ فقط راني نركز عليها!!
3_ماحليتش مواضيع بزاف في المواد المُكمِّلة ، كل ما تحلو راكم في الفايدة ، حلو مواضيع البكالوريا،
4_عدم تنظيم الوقت ، كل ما تنظمو وقتكم راكي في الفايدة و تعرفو شاراكم ديرو و وين راكم واصلين ، أما كي تبقو تخدمو بعشوائية و تتخربشو
5_ و هذا مهممممممم⚠️ أني كنت كي نقرا درس صايي من المرة الأولى نفوته و هذا خطأ ، هكا كي تولوله تلقو رواحكم نسيتووه و تقروه مالجديد و تحفظو من جديد.خصوصا مواد الحفظ ، فدائما كي تقرو ولا تفهمو ولا تحفظو حاجة ابقاو راجعو باستمرار.
☁️إن أصبت فمن الله و إن أخطأت فمن نفسي و الشيطان ، يا رب يوفقكم و يسدد خطاكم ،و ادعوا الله خصوصا في هذه الأيام المباركة و هذا الشهر الفضيل ، و كي تتعبو ارتاحو شويا و عاودو بدو بطاقة اكبر و لكن ماتريحوش بزاف❗️ حتى جسمكم يتعود على الراحة و ماتقدروش تبدو من جديد ، توكلو على الله و ما تخمموش في النتيجة ، اسعوا و ديرو لي تقدرو عليه و بإذن الله ربي يفركم و يوفقكم و يرزقكم اكثر من سعيكم ، و غادي كي تفوتو الباك يولي يبانلكم ساهل والله فقط حنا مين نتوترو و نخافو ... اما هو ديرو في بالكم بلي كيما الاختبارات لي ديروهم كل فصل بصح هذا فيه كل الفصول
و السلام عليكم و رحمة الله تعالى و بركاته